Tumne kaha aur maine sun liya
Tum bolte gaye, main sunti gayi
Tum barse, mere labon se ek shabh bhi na nikla
Bas khadi rahi, chupchap, sunti rahi

Ab jaa rahe ho, main nahin rokoongi
Tumhari har baat ko apne seene se lipat kar rakhoongi
Ussi tarah jaise tumhare har baat ko maine sambhala hai
Tumhara hona…is sansar mein, is zindagi mein, mere pass, mujhse door
Tumhara tadapna, tumhara rona
Tumhara aana aur tumhara jaana

Kyonki tum phir bologe
Tumhe zindagi se phir taqleef hogi
Aur tum mere hi pass phir aaoge

Tab main yaad karoongi
Tumhari yeh baatein..har ek woh baat
Jisse maine mehsoos kiya,
Jisse maine apne andheron ko dekha
Jisne mujhe rulaya

Aur mein tab bhi kuch nahin kahoongi
Bas chupchap khadi, sunti rahoongi
Aur yaad karoongi
Ke yeh baatein pehle bhi hui thi
Aur phir hongi